Fréttir

Viðtöl við 'síldarfólk'

6. maí 2019

Síðustu vikurnar hefur Anita Elefsen safnstjóri ferðast um landið með kvikmyndatökumanni í þeim tilgangi að taka viðtöl við bæði menn og konur sem unnu í síld, hvort sem var í landi eða á sjó. Meginmarkmiðið er að afla heimilda um líf og störf fólks, tíðarandann, rómantíkina, erfiðið, tilfinningarnar, tónlistina, félagslífið, verkunaraðferðir, hjátrú og aðra mikilvæga þætti þessa tímabils í sögu þjóðarinnar og varðveita á Síldarminjasafninu.

Jafnframt er ætlunin að velja stutt brot úr viðtölunum til miðlunar í safnhúsum Síldarminjasafnsins. Sýnt er að áhugi gesta kviknar fljótt þegar sagan er sögð út frá persónulegri reynslu eða hún persónutengd á einhvern hátt. Að því sögðu má gera ráð fyrir að lifandi frásagnir fólks sem sjálft tók þátt í síldarævintýrinu veki mikinn áhuga gesta og dýpki skilning þeirra á þeirri sögu sem miðlað er á safninu.

Viðmælendur hafa fram til þessa verið fimmtíu talsins, á Siglufirði, Dalvík, í Hrísey, á Akureyri, Húsavík, Ísafirði, Reykjavík og Akranesi. Meðal þeirra sem rætt hefur verið við eru fyrrum síldarstúlkur, verksmiðjukarlar, sjómenn, skipstjórar og netagerðarmenn.

Á næstum dögum verður farið austur á Seyðisfjörð og til Raufarhafnar og þar með lokið við upptökur í bili. Áætlað er að viðmælendur verði nálægt sjötíu í heildina - en upphaflega var stefnt að þrjátíu viðtölum.

Verkefnið er styrkt af Safnaráði en þar að auki hafa söfn og menningarstofnanir lagt verkefninu lið með vinnuaðstöðu sem hefur komið sér afar vel. 

Fréttir