Síldarminjasafn Íslands

Aníta Elefsen safnvörður á Síldarminjasafninu fór fyrir skömmu í heimsókn til ferðaskrifstofanna Iceland Travel og Atlantik til að kynna Siglufjörð og Síldarminjasafnið sem ákjósanlegan áningarstað skemmtiferðaskipa. Síldarminjasafnið hefur tekið á móti skemmtiferðaskipum frá árinu 2002 og hafa þau verið eitt til þrjú á ári.
Það hefur tíðkast í nokkrum sveitarfélögum hérlendis að þau hafi kynnt hafnir sínar skipulega gagnvart umboðsskrifstofum skemmtiferðaskipa – og orðið vel ágengt. Það má segja að Síldarminjasafnið hafi tekið af skarið til þess að auka þessi viðskipti.
Heimsókn Anítu gekk vel og voru starfsmenn ferðaskrifstofanna mjög jákvæðir í garð safnsins og Siglufjarðar. Nú þegar hafa tvö skip bókað heimsókn á Síldarminjasafnið snemma næsta sumar. -ök