Síldarminjasafn Íslands

Síðastliðinn föstudag, 1. júní, tók Örlygur Kristfinnsson safnstjóri Síldarminjasafnsins á móti samfélagsviðurkenningu Byggðastofnunar, Landstólpanum. Viðurkenningin er veitt þeim sem hafa vakið jákvæða athygli á landsbyggðinni með verkefni, starfsemi, umfjöllum á opinberum vettvangi eða með öðru móti.

Á skjali sem honum var afhent kom eftirfarandi fram; „Örlygur hefur með störfum sínum verið frumkvöðull í uppbyggingu á sviði menningarferðaþjónustu og safnastarfs á Siglufirði. Vegna áhuga hans og dugnaðar hefur ímynd staðarins breyst til hins betra og virkni og jákvæðni aukist í samfélaginu, sem meðal annars skilar sér í auknum ferðamannastraumi.“
Við móttöku Landstólpans flutti Örlygur ávarp þar sem hann hann sagði meðal annars „þótt mér hafi verið þakkað og ég sé heiðraður á þessari stundu þá á það að vera öllum ljóst að enginn einn gat unnið hið stóra verk. Það ber að þakka það hinum fjölmörgu sem lögðu á sig vinnu og ómæld framlög í þágu hugsýnarinnar sem hafði verið teiknuð upp.“