Síldarminjasafn Íslands

Þrír þingmenn Samfylkingarinnar voru staddir á Siglufirði í gær. Þetta voru þeir Kristján Möller, Sigmundur Ernir og Árni Páll en þeir höfðu boðað til opins fundar með íbúum Fjallabyggðar. Einnig höfðu þeir boðað komu sína á Síldarminjasafnið fyrr um daginn. Kristján Möller, sem fæddur er og uppalin á Siglufirði vildi kynna flokksbræðrum sínum hvernig umhorfs var á Siglufirði á síldarárunum og fengu þeir prýðiskynningu í Bátahúsinu. Eftir að hafa gengið um kaldar bryggjurnar var farið upp á loft í kaffi þar sem biðu „bestu ástarpungar landsins“ og síld og rúgbrauð að hætti Síldarminjasafnsins. Yfir heitu kaffi voru heimsmálin rædd og pólitíkina bar á góma. Í móttökunefnd voru Rósa Margrét Húnadóttir, starfsmaður safnsins og Guðmundur  Skarphéðinsson, stjórnarformaður.