Bátahúsið

  • batahus

Bátahúsið var byggt árin 2003-2004 og vígt af Hákoni krónprinsi Noregs þann 29. júní 2004 (sjá nánar um uppbygginguna).

Í anddyri Bátahússins er uppsett gömul veiðarfæraverslun með innréttingum og verslunarvarningi úr Veiðarfæraverslun Sigurðar Fanndal sem rekin var á Siglufirði (frá u.þ.b. 1930-1997). Einnig er í forskálanum sýning um líffræði síldarinnar og síldarleit.
Í meginsýningarrými Bátahússins er endursköpuð stemning síldarhafnarinnar frá 1950-55. Þar liggja síldarskip og bátar við bryggjur með viðeigandi veiðarfærum og gamlar kvikmyndir frá síldveiðum sýndar á stóru tjaldi. Í bryggjuskúrum eru netagerðarmönnum og smábátaútgerð gerð skil.

Bátarnir sem sýndir eru:

  1. Týr SK 33. 38 tonna eikarbátur smíðaður á Fáskrúðsfirði 1946. Einn af nýsköpunarbátunum úr raðsmíðaverkefni á vegum ríkisstjórnarinnar. Hét fyrst Skrúður SU, síðan Hrafn SH og loks Týr. Var lengi gerður út frá Sauðárkróki og afskráður þar 1988. Stundaði margvíslegar veiðar en hér sýndur sem síldveiðiskip með tvo snurpunótabáta.
  2. Snurpunótarbátur merktur Skildi SI 82. Smíðaður í Slippnum á Siglufirði 1940-1950, fura og eik.
  3. Snurpunótarbátur frá Brávöllum í Eyjafirði. Uppruni óviss en líklega var hann notaður við smásíldarveiðar í Eyjafirði á árunum 1950-65.
  4. Sigurvin SI 16, bátur Gústa guðsmanns. Upprunalega norskur árabátur úr furu. Síðar breytt og gerður að lítilli trillu. Gústi gerði út bát sinn í kompaníi við Guð almáttugan um áratugaskeið. Allar tekjur af útgerðinni runnu til kristnidómsfræðslu barna í fjarlægum heimsálfum.
  5. Draupnir EA 70. 12 brl. Smíðaður 1954 úr eik á Hauganesi í Eyjafirði af Sigfúsi Þorsteinssyni. Gerður út frá Hauganesi, seldur til Þórshafnar 1980 og þaðan til Vestmannaeyja 1990 og hét þá Kristín VE 40. Hér sýndur sem reknetaveiðibátur til síldveiða.
  6. Hringnótarbátur merktur Einari Hálfdáns ÍS 3. Talinn smíðaður í Bátalóni í Hafnarfirði á tímabilinu 1950-1955.
  7. Árabátur Soffíu á Nesi. Smíðaður í Slippnum á Siglufirði um 1938 fyrir Soffíu Jónsdóttur heimasætu á Staðarhóli og síðar húsfreyju á Siglunesi. (Sjá söguna „Hver var í bátnum“ í Siglfirskar þjóðsögur og sagnir eftir Þ. Ragnar Jónsson bls. 117)
  8. Árabátur/julla Guðjóns Eggertssonar, smíðuð af Þorgrími bátasmið í Hofsósi.
  9. Árabátur/julla Jóns Björnssonar, smíðuð af Jóni um 1976.
  10. Norskur árabátur. Aldur og uppruni óviss (frá 1950?) Notaður við smásíldarveiði á Pollinum á Akureyri á vegum niðursuðuverksmiðju K. Jónsson og co.
  11. Léttabátur Stíganda. Einn af þremur björgunarbátum sem tólf manna áhöfn Stíganda ÓF bjargaðist á er skipið fórst í Norðurhöfum 1967.